आजबाट धुव्र अमात्य स्मृति कप

 

नुवाकोटमा आजबाट स्वर्गीय धुव्र अमात्य स्मृति कप नुवाकोट जिल्ला क्लब स्तरीय फुटवल प्रतियोगिता शुरु हुँदैछ । 

प्रतियोगिताको आज दिउँसो पुर्व अर्थमन्त्री एवं नेपाली कांग्रेसका प्रवक्ता डा. प्रकाशशरण महतले उद्घाटन गर्दै हुनुहुन्छ । नुवाकोट आदर्श बहुमुखी क्याम्पसको खेलमैदानमा शुरु हुन लागेको प्रतियेगितामा जिल्लाका दशवटा क्लवहरु सहभागी हुँदैछन् । प्रतियोगिताको विजेताले एकलाख रुपैयाँ नगद, टफ्री, मेडल र प्रमाणपत्र पाउने आयोजक बट्टार युथ क्लबका अध्यक्ष सुरज श्रेष्ठले जानकारी दिए । यस्तै प्रतियोगितामा दोस्रो हुनेले पचास हजार रुपैयाँ नगद, टफ्री, मेडल र प्रमाणपत्र पाउने यसअघि क्लवले आयोजना गरेको पत्रकार सम्मेलनमा जानकारी दिइएको छ । प्रतियोगितामा म्यान अफ दी म्याच, उत्कृष्ट गोलकिपर, उत्कृष्ट प्रशिक्षक, उकृष्ट डिफेन्डर र सर्वाधिक गोलकर्ता समेतले ट्रफी हात पार्ने आयोकजकले जानकारी दिएको छ ।

लिगकम नकआउटका आधारमा खेलाइने प्रतियोगिताको खेल तालिका समेत सार्वजनिक भईसकेको छ । प्रतियोगितामा करिव साढे सात लाख रुपैयाँ खर्च हुने आयोजकले अनुमान गरेको छ । बट्टार युथ क्लबका पुर्व खेलाडी स्वर्गीय धुव्र अमात्यको स्मृतिमा क्लबस्तरीय फुटवल प्रतियोगिता हुन लागेको हो । 

बागमती प्रदेशमा वैशाख २४ गते सार्वजनिक बिदा

हेटौँडा, वैशाख १२ गते। बागमती प्रदेश सरकारले प्रदेश सरकारी कामकाजको भाषा शुभारम्भ हुने दिन यही वैशाख २४ गते सार्वजनिक बिदा दिने निर्णय गरेको छ।

बागमती प्रदेशको मुख्यमन्त्री तथा मन्त्रिपरिषद् कार्यालयमा बुधबार बसेको मन्त्रिपरिषद् बैठकले प्रदेश सरकारी काम काजको भाषा शुभारम्भ भएको अवसरमा वैशाख २४ गते प्रदेशभर सार्वजनिक बिदा दिने निर्णय गरेको हो। 

बागमती प्रदेशका आन्तरिक मामिला तथा कानुनमन्त्री गङ्गानारायण श्रेष्ठले वैशाख २४ गते नै प्रधानमन्त्री पुष्पकमल दाहालले काठमाडौँको वसन्तपुरमा सार्वजनिक समारोहका बिच सम्बोधन गरेर प्रदेश सरकारी काम काजको भाषा प्रदेशभर शुभारम्भ भएको घोषणा गर्ने कार्यक्रम तयभएको जानकारी दिनुभयो। 

उहाँले मन्त्रिपरिषद् बैठकले वैशाख २४ गतेबाटै प्रदेश सरकार, निकाय, मातहतका कार्यालयका साइनबोर्डमा नेपाली भाषा, तामाङ भाषा र नेपाल भाषामा लेखिने बताउनुभयो।

नुवाकोट सिन्दुरे जात्रा– भैरबी मन्दिर परिसरमा लिङ्गो ठड्याईयो

नुवाकोटको प्रचलित जात्रा सिँदुरे जात्रा अन्तर्गत विभिन्न क्रियाकलाप शुरु भएको छन् । जात्राको क्रममा सोमवार राती भैरवि मन्दिर परिसरमा लिङ्गो उठाईएको छ । जनप्रतिनिधी, नेपाली सेना र स्थानीयको सहभागितामा भैरबी मन्दिर परिसरमा लिङ्गो उठाईएको हो ।

सोमबार बेलुकी धामी नुहाउने, क्षेत्रपालमा गई महावनी लिने, रातको ८ बजे बुढी भैरवीमा तल्लो लिंगो उठाँउने र सोही ठाउँबाट यात्रा गर्दै बली चढाउँदै भैरवी मन्दिरको अगाडि आउने र नेपाली सेनाबाट माथिल्लो लिंगो ठढ्याउने, त्यसपछी निमन्त्रणा पूजा गरी राती भैरवी माई देवीलाई रथमा राख्ने लगायत क्रियाकलाप सञ्चालन भएका हुन् । बैसाख  ११ गते  साततले दरबारमा सिन्दुर हाल्ने र तुलजा भवानीको मन्दिरमा धामीबाट महाबली लिई धामी धमिनी, कुमार, गणेश, निसान गुठियार सहित भैरवीस्थान आई भैरवी माइको रथ उठाई बाजागाजा रकमी गुठियार सवै धरमपानी, बाराही, बट्टार इनारपाटी,बाडाचौतारो हुदै देवीघाट पुग्ने, सोही राती विधिपूर्वक पुजा गरी धामीलाई भोग दिएपछि पुर्णिमाको काम सम्पन्न हुने छ। 

२०८१ बैसाख १२ गते विहान ‘इही’ गर्ने, विधिपुर्वक पुजाआजा गर्ने बेलुका रथ धामी धमीनी देवीघाटबाट फर्कने, राती देवीघाट बाडाचौतारो–इनारपाटी–बट्टार–पुरानोबजार हुदै बाराहीबाट धरमपानीमा वैशाख १३ गते विहान आइपुग्नेछ । २०८१ बैसाख १३ गते दिनको ३ बजे विदुर २ धरमपानीबाट श्री भैरवी माइको रथ श्रीकाधामी, धमिनी, गणेश, कुमार गुठीयार बाजागाजा साजवाज निसान सहित आसागुर्जा टोली, सैनिक सुरक्षाका साथ भैरवी स्थान तर्फ प्रस्थान गर्ने, भैरवी माइको प्रांगणमा सिन्दुर हालेर तुलजा भवानीको मन्दिर पुग्ने, सोही रात भैरवी मन्दिर परिसर शितपाटी डवलीमा श्रीका धामीद्वारा भोग खानेछन् । २०८१ बैसाख १४ गते बेलुका साततले दरबार तुलजा भवानी मन्दिर परिसरमा विधि पुर्वक स्यावजी बाढिने छ । 

२०८१ बैसाख १८ गते वेलुका लामपाटीमा स्यावजी बाढिने छ । बैसाख १९ गते हनुमान ढोका कर्णेलचोकबाट आउनु भएको भगवतीलाई नागपानी भगवती थानमा विधि पूर्वक पुजाआजा गर्ने । बैशाख २० गते बेलुका भैरवीको विधि पूर्वक पुजाआजा गरी भैरवी भित्र्याउने । २०८१  वैशाख २१ गते विहान माथिल्लो लिंगो ढाल्ने । २०८१ वैशाख २२ गते विहान तल्लो लिंगो ढाल्ने।  उपरोक्त कार्यमा विभिन्न स्थानहरुमा बढाई सहित यस वर्षको श्री भैरवी माइको वर्ष बन्धन सिन्दुरे जात्रा पर्व समाप्त हुने जनाईएको छ ।

पिपलटारमा सप्ताह ज्ञान महायज्ञ शुरु

नुवाकोट । ९ बैशाख । नुवाकोटको विदुर ५ पिपलटारमा रहेको पिपलटार फुटसलमा सप्ताह ज्ञान महायज्ञ शुरु भएको छ । पिपलटार फुटबल क्लबले आयोजना गरेको श्रीमदभागवत महापुराण सप्ताह ज्ञान महायज्ञ धार्मिक सत्संग एवम प्रवचन कार्यक्रमको आईतवार विदुर नगरपालिकाका प्रमुख राजन श्रेष्ठले उद्घाटन गरेका छन् । 

सप्ताह ज्ञान महायज्ञको पहिलो दिन आयोजक तथा स्थानीयले बाजागाजा सहित कलश यात्रा गरेका छन् । क्लवले एम्बुलेन्स खरिद तथा खेलाडी कल्याणकोष स्थापनाको सप्ताह ज्ञान महायज्ञ आयोजना गरेको हो । 

१७ गतेसम्म सञ्चालन हुने सप्ताह ज्ञान महायज्ञमा कथा शिरोमणी पण्डित दिपकप्रसाद पौडेलले संगीतमय श्रीमद्भागवत महापुराण कथा प्रवचन गरिरहेका छन् । क्लवले दानविर महानुभावहरुलाई उचित सम्मान गर्दै नगद रु ५,०००  देखि शिलालेख सहित सम्मान पत्र दिने, रु १०,००० भन्दा माथि आजीवन सदस्यता, रु २५००० देखि दानविरहरुको श्रेयष्कर प्रमाणपत्र एवम अभिलेख राखिने, रु ५०,००० देखि माथि दानविर घोषणा गर्ने जनाएको छ । यस्तै,  १ लाख भन्दा माथि सहयोग गर्नेलाई मानार्थ प्रमाणपत्र प्रदान गरी एम्बुलेन्समा नाम समेत राखिने क्लवले जनाएको छ । 

सप्ताह ज्ञान महायज्ञको संरक्षकमा विदुर बजरपालिका र  सहसंरक्षकमा विदुर ५ वडा कार्यालय रहेको छ । 

औषधि पसल मापदण्ड विपरीत

 

नुवाकोटका अधिकांश औषधि पसल मापदण्ड विपरीत रहेको पाइएको छ । जिल्ला बजार अनुगमन समिति र औषधि व्यवस्था विभागका प्राविधिक सहितको टोलीले गरेको संयुक्त अनुगमनका क्रममा औषधि पसल मापदण्ड विपरित पाईएको हो । 

विदुर नगरपालिकाभित्र सञ्चालित अधिकांश औषधि पसलहरूले स्वास्थ्य सेवाका आधारभूत मापदण्डसमेत पालना नगरेको पाइएपछि नगद जरिवानाका साथै तीन दिनभित्र औषधि व्यवस्था विभागमा सक्कल कागजातसहित उपस्थित हुन टोलीले निर्देशन दिएको छ । 

नियमविपरीत सञ्चालन भएको ६ वटा औषधि पसललाई नगद जरिवाना गरिएको छ । विदुर नपा १, २, ४, ५ र ९ मा सञ्चालित २३ वटा औषधि तथा फार्मेसी पसलहरूको स्थलगत अनुगमन गरिएको हो । अधिकांश मापदण्डको पालना नगरेको पाइएको जिल्ला स्वास्थ्य कार्यालय नुवाकोटले जनाएको छ ।

मापदण्ड विपरीत रहेको पाइएपछि विदुर नपा १ त्रिशूली बजारमा रहेको रोशन मेडिकल हल, विदुर ९ बाघटारमा रहेको अनुप मेडिकल हल, पिपुल्स च्वाइस फार्मेसी, विदुर २ विदुर वजारमा रहेको स्टार अस्पताल फार्मेसी, बट्टार बजारमा रहेको निको फार्मेसी र विदुर ५ देवीघाटमा रहेको जालपा मेडिकल हललाई जनही १०÷१० हजार रुपैयाँ नगद जरिवाना गरिएको अनुगमनमा सहभागी उद्योग तथा वाणिज्य कार्यालय नुवाकोटका प्रमुख किशोर सापकोटाले बताए। उनका अनुसार जरिवाना तिरेपछि पहिले ताला लगाइएको पसल खुला गरिएको छ ।