स्ववियु निर्वाचन ः नेविसंघका रविन दाहाल नेतृत्वको प्यानल नै बिजयी

६ चैत्र

नुवाकोटको सवैभन्दा धेरै विद्यार्थी संख्या रहेको नुवाकोट आदर्श वहुमुखी क्याम्पसको स्ववियु निर्वाचनमा सत्तापक्षीय गठबन्धन विद्यार्थी समुह विजयी भएको छ । सोमवार विहान सम्पन्न मतगणनाबाट नेविसंघ, अनेरास्ववियु क्रान्तिकारी र अनेरास्ववियूको संयुक्त समुह विजयी भएको हो । 

निर्वाचनबाट नेविसंघका रविन दाहाल ३ सय ४१ मत सहित सभापतिमा विजयी भएका छन् । यस्तै सचिवमा अनेरास्ववियु क्रान्तिकारीका राजेन्द्र पनेरु ४ सय ३० मत र कोषाध्यक्षमा अनेरास्ववियूका मनोज पौडेल ३ सय ४० मत सहित विजयी भएका छन् । सदस्यहरुमा अश्विन रिमाल, सन्तोष पन्त, सुप्रिया पौडेल, जनक भट्ट, अस्मिता पौडेल, सञ्जिता रिमाल र प्रदिप ढुङ्गाना निर्वाचित भएका छन् । प्रत्यक्ष निर्वाचनमा निर्वाचनमा स्वतन्त्र उमेदवारी दिएको रिजन प्रधान नेतृत्वको समुह दोश्रो भएको छ भने नेकपा एमालेको भातृ संगठन अनेरास्ववियुले तेश्रो मत पाएको छ । 

यस्तै समानुपातिक तर्फ २ सय ८६ मत सहित नेविसंघ पहिलो विद्यार्थी संगठन भएको छ । निर्वाचनमा नुवाकोट क्याम्पसमा अध्ययनरत १ हजार १ सय ४३ विद्यार्थी मतदाता रहेकोमा ७ सय ४२ मत खसेको थियो । नुवाकोट आदर्श वहुमुखी क्याम्पसमा १४ वर्षपछि स्ववियु निर्वाचन भएको हो ।